ROCKETS BINOMBA ANG LAKERS

NAGPASABOG si Russell Westbrook ng 41 points at nagdagdag si Robert Covington ng 14 nang igupo ng ­Houston Rockets ang Los ­Angeles Lakers, 121-111, noong Huwebes.

Naipasok ni Covington ang pares ng 3-pointers sa huling tatlong minuto sa kanyang debut sa Rockets makaraang kunin siya sa isang four-team trade mula sa  Minnesota Timberwolves noong Martes.

Naisalpak ni Covington ang isang 3-pointer, may 2:40 ang nalalabi, para sa  115-111 kalamangan at nagdagdag ng isa pa sa huling 1:27 para sa 120-111 bentahe.

Gumawa lamang si James Harden ng 14 points sa laro sa 3 of 10 shooting para sa Rockets na nakopo ang ika-4 na sunod na panalo.

Umiskor si Anthony Davis ng 32 points at kumalawit ng 13 rebounds, habang nag-amnbag si LeBron James ng 18 points, 15 assists at 9 rebounds para sa Lakers.

BLAZERS 125, SPURS 117

Tumabo si Damian Lillard ng  26 points at 10 assists upang tulu­ngan ang Portland Trail Blazers na maitakas ang come-from-behind win laban sa bisitang San Antonio Spurs noong Huwebes ng gabi.

Tumipa si Carmelo Anthony ng 20 points at 8 rebounds, at nagdagdag si CJ McCollum ng 19 points para sa Trail Blazers na naitala ang ika-6 na panalo sa walong laro.

Napantayan ni Gary Trent, Jr. ang kanyang career best na anim na 3-pointers habang gumawa ng 18 points. Napantayan naman ni Hassan Whiteside ang kanyang season best 23 rebounds at nagtala ng 17 points at 4 blocked shots, habang nagdagdag si Anfernee Simons ng 10 points para sa Portland,  na bumuslo ng  9 of 10 mula sa 3-point range sa fourth quarter.

Kumana si Trey Lyles ng season-high 23 points at humugot ng 10 rebounds para sa Spurs, na natalo ng anim sa kanilang hu­ling walong laro.

Gumawa si DeMar DeRozan ng 21 points, habang nagdagdag sina LaMarcus Aldridge ng 20 points at 8 rebounds, Derrick White ng 15 points, Patty Mills ng 14 at Bryn Forbes ng 11 para sa San Antonio, na nahulog sa 0-3 sa eight-game Rodeo Road Trip nito.

PELICANS 125, BULLS 119

Tumirada si rookie Zion Williamson ng 21 points, at nag-ambag si JJ Redick ng 18 mula sa bench nang pataubin ng bisitang New Orleans Pelicans ang Chicago Bulls.

Humataw si All-Star forward Brandon Ingram ng 15 points sa loob ng 21 minuto bago nagtungo sa bench ng New Orleans sa kalagitnaan ng third quarter bilang precaution makaraang ma-sprain ang kanyang right ankle sa second quarter.

Tumipa sina Josh Hart at Nicolo Melli ng tig-12 points para sa New Orleans, habang nag-ambag sina Derrick Favors ng 8 points at 15 rebounds, at Lonzo Ball ng 9 points at 10 assists.

Sa iba pang laro ay naungusan ng New York Knicks ang Orlando Magic, 105-103; at ginapi ng Milwaukee Bucks ang Philadelphia 76ers, 112-101.