TESDA GINAWANG TULAY NG ‘EX-DRUG  ADDICT’ PARA MAGBAGO!

DETERMINADONG magbagong buhay ang dating lulong sa droga na si Ben Mark Ocla­rit,  19-taong gulang. Pinili niyang layuan ang masamang bisyo at upang tuluyang  malihis ang kanyang atensiyon,kumuha siya ng technical-vocational program na  Shielded Metal Arc Welding (SMAW) NC l at NC ll noong 2017.  Ngayon, namamasukan siya  bilang  welder sa isang malaking construction company sa Agusan del Norte.

“Mabait, masikap at matulungin.” Ganito, inilarawan ng kanyang mga magulang si Ben, residente ng Poblacion, Bacuag, Surigao del Norte.  Siya ang ­panganay sa apat na magkakapatid, magsasaka ang kanyang tatay at simpleng maybahay ang kanyang ina.  Hindi siya nakapagpatuloy sa pag-aaral bunsod sa pagkalulong nito sa droga.

Labing-anim na taong gulang pa lamang si Ben nang una n’yang matikman ang droga at mula noon, hindi na siya nakawala sa pagkakagapos sa ipinagbabawal na gamot dala ng impluwensiya ng kanyang mga barkada.  Ang kanyang bisyo ay nagbunga pa ng isang problema para sa kanyang pamilya. “Sa madalas kong paggamit, nagkaroon ako ng karelasyon na mas matanda pa sa akin.  Hindi ito nagustuhan ng aking mga magulang, sapagkat masyado pa daw akong bata.  Nangangamba sila na  baka mag-aasawa ako ng maaga.”

Upang makaiwas sa bisyo at maagang pag-aasawa, ipinadala si Ben  ng mga magulang nito sa kanyang tiyuhin sa Cebu. Isang magaling na welder ang kanyang tiyuhin, kaya tinuruan siya at  nang matuto, ipinasok siya ng partime job.

“Pero anim na buwan lang ang itinagal ko sa Cebu dahil hindi ko kinayang malayo nang  matagal sa aking pamilya.  Kaya pinauwi ako ng aking nanay.”

Sa kanyang pagba­balik sa Surigao del Norte, kinumbinse siya ng kanyang kaibigan na kumuha ng libreng training ng SMAW NC l at NC ll sa Surigao del Norte College of Agriculture and Technology (SNCAT), isa sa mga accredited  TESDA Technology Institutions (TTIs).  Hindi siya nagdalawang-isip na mag-enroll at naging beneficiary siya ng TESDA scholarship  sa ilalim ng ng Barangay Kabuhayan Skills Training Program (BKSTP).

Noong una, itinu­ring na katuwaan ito ni Ben, ngayon  isa na itong malaking tagumpay  para sa kanyang buhay  dahil sa pamamagitan ng TESDA skills training, may maayos na siyang trabaho bilang isang welder sa OIC Construction and Development Corporation sa Agusan del Norte.  Ngayon, ba­lak  n’yang  magtrabaho sa abroad.