UPANG MAPATAKBO NANG MAAYOS ANG NEGOSYO: NAG-TESDA!

SA kagustuhang magtagumpay ang itinayong  beauty salon, minabuti ni Saylie  M. Adarlo na mag-aral ng  Beauty Care NC ll sa Southern Isabela College of Arts and Trades (SICAT). Hindi siya nabigo, dahil malaking tulong ang mga natutunan niya sa skills training upang mapatakbo  ng maayos ang kanyang   salon business at nakikilala na rin siya bilang beauty guru sa kanilang lugar.

Si Saylie, 31-anyos ay  manager at may-ari ng V-CUTZ Hair Expert (Barbershop and Salon) sa Santiago City, Isa­bela.  Naisipan niyang magtayo ng sariling salon business dahil ang kanyang asawa at mga biyenan ay nagmamay-ari ng isang vaciador store sa Isabela.  Ito’y  nag-aalok ng ‘blade sharpening services’. Bukod rito,  may  paninda rin  silang   mga beauty care products at tools.

Taong 2015, kinausap at ipinaliwanag ni  Saylie  sa kanyang asawa ang tungkol sa  kanyang planong  salon business at  nang pumayag,  agad niya itong  sinimulan.  Nagrenta siya ng puwesto  at kumuha ng isang   all-around beautician at hairdresser at tatlong haircutters para sa kanyang bagong bukas na negosyo.

Sumunod nito, kumuha siya ng BC NC ll at Hairdressing NC ll sa SICAT upang ihanda ang kanyang sarili sa  mga kinakailangan nitong skills para sa sinimulang  negosyo. Labis ang kanyang pasasalamat sa institusyon para sa komprehensibo at mahigpit na skills training programs na naayon sa kanyang pangangailangan para sa pagpapatakbo ng kanyang salon.

Para kay Saylie, mahalagang patuloy na i-motivate ang sarili para mas  palawakin pa ang kaalaman. Alam nyang mahalaga ito para mas mapaunlad pa ang kanyang   business. Sa ngayon,  plano  niyang  magbukas ng isa pang sangay ng kanyang salon sa kanilang probinsiya.