DIGONG PASADO SA RELIGIOUS GROUPS

TUMANGGAP ng 91 porsiyentong approval rating si Pa­ngulong Rodrigo Roa Duterte mula sa sa iba’t ibang religious groups sa bansa.

Sa ginanap na press conference sa Quezon City, nagsama-sama ang iba’t ibang samahan ng relihiyon upang bigyan ng grado ang Pangulong Duterte kaugnay sa mga nagawa nito bago pa man dumating ang nalalapit na State of the Nation Address (SONA) nito.

Ayon kay Pastor Jaime Poliquit, founder/chairman ng grupong Generous Life International Ministry Inc.na pangunahing nakita nila ang magandang pamamalakad ng admi­nistrasyong Duterte si­mula ng naupo ito bilang Pangulo.

Ipinagdarasal din ng mga ito ang Presidente na manatiling ligtas, malakas at malayo sa anumang sakit upang maipagpatuloy nito ang kanyang na­lalabi pang termino.

Sinabi naman ni Pastor Hery Pacifico ng Deborah Ablaze International na pasado rin sa kanila si Pangulong Duterte dahilan sa nakikita nila na nasa tamang daan ang tinatahak ng liderato nito gayundin ang pagpapanatili ng matatag na ekonomiya sa bansa at magandang takbo ng peace and order sa Filipinas.

Ipinahayag pa ni Pacifico na ginawa ng kanilang grupo ang pagsuporta upang magbigay ng moral support sa Pangulong Duterte sa kabila ng maaanghang na mga pananalita nito sa publiko.

Naniniwala ang naturang pastor na nais lamang ng Pangulo na mapabuti ang lagay ng bansa kung kaya’t nakakakitaan ito ng matitinding paha­yag bunsod ng pagka dismaya nito sa ilang tiwa­ling opisyal ng gobyerno.

Kanila rin ipinana­langin ang bawat opisyal ng pamahalaan gayundin ang mga local government units (LGUs) na manatili ang suporta sa Pangulo upang maipagpatuloy ang hangaring mapaunlad at matupad ang magagandang programa nito sa bansa.

Idinagdag naman ni Pastor Joshua Beria ng Impact Alliance of minister Worldwide na todo ang kanilang suporta sa Pangulo bunsod ng halos lahat ng isyu ay kanyang mabilis na tinutugunan sino man ang masagasaan at bihira lamang aniya ang katulad ng Pangulo na hanggad ang agarang solusyon sa mga problema ng lipunan.

Kabilang naman sa mga nagkakaisang religious groups na nagsidalo sa programa ay mula sa Christian Life Fellowship Church – One for All, All for God; Capitol Christians Leadership; Jesus Family Christian Church; National Alliance for Hu-manitarian Mission (NAHUM) Inc.; Impact Alliance of Minister Worldwide; Deborah Ablaze Foundation International;  Shema Christian Assembly Ministry; Jesus Christ Thy Kingdom Come at Generous Life International Ministry.        BEN-DICT  ABAYGAR, JR.