MGA MANOK NI DIGONG SA SENADO ILALABAS NA

INIHAYAG ni Pangulong Rodrigo Duterte na isa-isa na ni­yang sinusuri ang mga kai­bigang ka­kandidato sa pagkasena­dor sa 2019 elections. Sa kanyang talumpati  kamakalawa sa Cagayan De Oro City, sinabi  ng Pangulo na ilalabas niya ang kanyang senatorial line up pagkatapos ng Pasko.

Nangako ito na  sasamahan niya para ma­ngampanya sa iba’t ibang lugar ang mga kandidatong napisil nito.

Ibinunyag nito na may mga kaibigan na siyang lumapit sa kanya at nagpapaendorso, ngunit humingi ng paumanhin ang Pangulo at  sinabi umano nito na  hindi niya kailanman ieendorso at ikakampanya ang mga kaibigan na may masamang rekord lalo na ang mga nasangkot sa korupsiyon.

Malinaw ang polisiya  ng Pangulo na tanging ang mga kandidato lamang na may competence o kakayahan, kapasidad at kuwalipikado ang kanyang susuportahan.

Iginiit nito na ayaw niyang matapos ang kanyang karera sa politika na may bahid ng masamang rekord at may masasabing negatibo ang tao lalo na sa isyu ng korupsiyon.

Hiniling ni Duterte na  suportahan ang kanyang mga ieendorsong kandidato.

Nagbiro pa ang Pa­ngulo na wala siyang magagawa kung iboboto pa rin ng taumbayan ang mga kagaya ng Magdalo o ni Senador Antonio Trillanes IV na walang ibang ginawa kundi ang manggulo at ang akala sa sarili ay mas matalino sa lahat.