(Para makapag-alok ng trabaho, oportunidad sa pagnenegosyo) AMYENDA SA PESO ACT PINAMAMADALI

PINAMAMADALI ni Deputy Speaker Loren Legarda ang pag-amyenda sa Public Employment Service Office Act of 1999.

Sa inihaing House Bill 631 ay pinalalawak ang saklaw ng PESO Act at ipinasasama rito ang entrepreneurship.

Nakasaad sa panukala na papalitan ang pangalan ng PESO ng PEESO o Public Employment and Entrepreneurship Service Office (PEESO).

Paliwanag ni Legarda, ang pagkakaroon ng entrepreneurship sa mandato ng PESO ay naglalayong makapag-alok ng trabaho at oportunidad sa pagnenegosyo na aangkop sa pangangailangan ng mga job seeker na sumailalim sa mga pagsasanay at konsultasyon.

Magtatatag din ng Barangay Employment and Entrepreneurship Service Office (BEESO) na magbibigay naman ng mas episyenteng sistema na mangangasiwa at magre-regulate sa labor market sa pamamagitan ng pag-uugnay  sa gap sa pagitan ng mga naghahanap ng trabaho at ng mga employer.

Dagdag pa ni Legarda, ang amyenda sa PESO Act ay layong maresolba ang matagal nang problema ng gobyerno sa mataas na unemployment at underemployment ng bansa.

Ang 1999 PESO Act ay huling inamyendahan noong 2015 kung saan isinama dito ang paglikha ng permanent plantilla positions ng mga PESO personnel at ang paghuhugutan ng pondo. CONDE BATAC