PSG NAGHIGPIT NG SEGURIDAD KAY DUTERTE

NAGING alisto ang mga kagawad ng Presidential Security Group (PSG) sa sinasabing security threat kay Pangulong Rodrigo Duterte kaya nilimitahan  maging ang mga ballpen, lapis at mga bottled water sa mga presidential visit sa iba’t ibang probinsiya.

Sa pagbisita ng Pa­ngulo sa  Barangay Labuan sa Ipil, Zamboanga Sibugay, hindi pinayagan ang mga mamamahayag na magdala ng ballpen at lapis maging mga bottled water.

Hindi rin pinayagan ang mga social worker, mga guro, estudyante at mga nurse sa venue kung saan magsasalita ang Pa­ngulo.

Hindi naman nagbigay ng paliwanag ang PSG kaugnay ng nasabing hakbang subalit hinihinalang bahagi ito ng pinaiiral na security protocol para sa Pangulo.

May report din na hindi naman kinuha ng PSG ang ballpen at bottled water ng ilang mamamahayag na nagko-cover ng talumpati ng  Pangulo sa bayan ng Ipil pero pinadistansya sila  mula sa Pangulo.

Nauna nang sinabi ni Presidential Assistant to the President Bong Go na may security threat sa Pangulo.

Sa pahayag ni Chief Supt. Billy Beltran, regional director ng Police Regional Office 9, hindi nila alam ang detalye kaugnay sa banta sa Punong Ehekutibo at hindi naman ito isinasapubliko ng PSG.

Nitong nakalipas na linggo ay nagtungo ang Pangulo sa Zamboanga City at Sulu para bigyang pagkilala at parangal ang 12  battle casualties (BatCas) ng Joint Task Force Sulu kung saan ay ginawaran sila ng Order of Lapu-lapu level of Kampilan Medal.

Binigyan ng pagkilala ang mga sundalo matapos na magtamo ng sugat sa inilunsad na matinding military operations ng Joint Task Force Sulu para mapulbos ang Abu Sayyaf Group (ASG).

Habang may 50 Marawi heroes mula sa Joint Task Force Sulu  ang pinagkalooban naman ng promotion nina Defense Secretary Delfin Lorenzana at AFP chief of staff Gen Carlito Galvez.

Isang simpleng donning of rank ang ginanap  sa Kuta Heneral Teodulfo Bautista sa Busbos, Jolo, Sulu bandang alas-4:30 ng hapon. VERLIN RUIZ