NADAGDAG sina dating Perlas Spikers Jules Samonte at Heather Guino-o sa lineup ng PLDT Home Fibr para sa 2022 Premier Volleyball League (PVL) season.
Si Guino-o, 24, ay naglaro para sa Perlas sa nakalipas na dalawang seasons matapos ang collegiate career sa Far Eastern University.
Hindi naman naglaro si Samonte sa kanyang final year sa Ateneo de Manila University upang maging professional, at sumali sa Perlas noong nakaraang taon sa PNVF Champions League.
Nagpapasalamat si Samonte, 23, sa pagkakaroon ng bagong koponan matapos na magpasiya ang Perlas na magbakasyon sa PVL.
Magiging bago ang kapaligiran para kay Samonte, na ginabayan nina fellow Ateneans Jhoana Maraguinot at Mich Morente sa Perlas. Nag-iisa siyang dating Lady Eagle sa lineup ng High Speed HItters.
Pinanatili ng PLDT, na mamanduhan ng bagong head coach na si George Pascua, sina Rhea Dimaculangan, Chin Basas, Eli Soyud, at Nieza Viray mula sa huling season, at kinuha rin sina Kath Arado, Jessey De Leon, Mean Mendrez, Dell Palomata, Jovie Prado, Wendy Semana, Fiola Ceballos, at Lhara Clavano.
