(Ease of doing business tiniyak na ipinatutupad) DUTERTE NANGAKO SA BIZMEN

NANGAKO si Pangulong Rodrigo Duterte sa mga negosyante na  mahigpit na ipatutupad ang mga polisiya  upang  maging business-friendly ang bansa partikular na ang implementasyon  ng Ease of Doing Business and Efficient Government Service Delivery Act of 2018.

Sa kanyang talumpati sa Grand Opening ng Acacia Hotel Davao sa Davao City, sinabi ng Pangulo na nananatili  ang administrasyon  sa pagpapatupad ng mga batas  na magkakaloob  ng  kaaya-ayang  sistema upang mahikayat  ng negosyo.

Hiniling din nito sa mga negosyante na iulat ang anumang pang-aabuso ng mga taga-gobyerno  na kanilang mararanasan.

Okey lamang umano sa Pangulo na sampalin ng mga negosyante o mamumuhunan  ang mga tiwaling  opisyal o empleyado ng gobyerno na nagtatangkang mang­gatas.

“Kaya sabi ko sa mga tao na, ‘Be assertive.’ If you are being milked or asked for something, tapos bayad ka na, sampalin mo, sabihin mo, ‘p***** i** ka. Bayad na ako niyan,’” anang Pangulo.

Wala na aniyang  dahilan para matakot ang mga negosyante na magsumbong at bukas 24  oras ang kanyang tanggapan  sa Malakanyang.

“Huwag kayong matakot mag-report. Kung pupunta ka sa akin sa Malacañang at mag-complain ka, Malacañang is open 24 hours a day. Sabihin mo lang sa gwardya, ‘Gisingin mo si Duterte kasi niloko ako at hiningian ako.’ And I will call that official in your presence. Nananampal talaga ako at nagsisipa ako,” ang pahayag ng Pangulo.