NCAA Season 99 women’s volleyball. Photo: Angela Davocol
Mga laro sa linggo:
(Filoil EcoOil Centre)
12 noon – Perpetual vs EAC (Men Finals)
2:30 p.m. – Benilde vs Letran (Women Finals)
SA KANYANG unang season sa paghawak sa kanyang alma mater, iginiya ni coach Oliver Almadro ang Letran sa Finals ng NCAA women’s volleyball tournament.
Kinailangan ng Lady Knights ng limang sets para gapiin ang Lyceum of the Philippines University, 25-15, 25-21, 19-25, 19-25, 15-11, at kunin ang unang championship appearance sa loob ng 12 taon kahapon sa Filoil EcoOil Centre.
Makakaharap ng Letran ang three-peat seeking College of Saint Benilde sa best-of-three series na magsisimula sa Linggo, alas-2 ng hapon, sa San Juan arena.
Ang Lady Knights ay huling umabot sa championship round sa back-to-back seasons noong 2011 at 2012. Natalo ang Letran sa parehong okasyon sa powerhouses San Sebastian at University of Perpetual Help System Dalta.
Umaasa si Almadro na maibalik sa Lady Knights ang korona laban sa Lady Blazers na hindi pa natatalo magmula noong 2020.
Ang Letran ay hindi pa nananalo ng women’s title magmula nang magwagi ng dalawang sunod noong 1998 at 1999.
Nanguna si Judiel Nitura, na nagmula sa pamilya ng student-athletes, para sa Lady Knights na may 23 points, nagdagdag si rookie Gia Maquilang ng 22 points at 16 receptions habang nagpamalas si Nizelle Martin ng solid all-around game na 13 points, 11 digs at 14 receptions.
Nanguna si Joan Doguna para sa Lady Pirates na may 22 points, kabilang ang 3 service aces, nagtala si Jaja Tulang ng 2 blocks para sa 12-point effort at gumawa ng 12 receptions, habang nagdagdag si Heart Bio ng 11 points.
