BULACAN – SINAMPAHAN na ng kasong murder ang isang 32-anyos na lalaki na target ngayon ng manhunt operation ng tracker team ng Marilao police makaraang pagsasaksakin ang kanyang kinakasamang senior citizen bunga ng matinding selos sa loob ng kanilang tinitirhan sa Regina Residencia, Barangay Loma de Gato, Marilao.
Base sa report ni P/Lt.Col. Amado Mendoza Jr, Marilao police chief, nakilala ang biktimang si Marissa Cuman, 60, na sinaksak sa dibdib umano ng suspek na si Lorenzo Soriano, 32, kapwa nakatira sa nasabing lugar.
Nabatid na noong Sabado nang huling makitang buhay ang biktima matapos itong sunduin ng ka-live in na suspek sa bahay ng kanyang anak sa Meycauayan City para umuwi na sa kanilang tirahan sa nasabing barangay.
Nakatanggap din ng text message ang kanyang anak na emergency at pinapupunta rin ang apo sa bahay ng lola at dito na nila nakitang patay ang biktima sa loob ng bahay nito.
Hindi na rin mahagilap ang suspek at pinaniniwalaan siyang nag-chat at nag-text sa anak at apo ng biktima. MARIVIC RAGUDOS
Comments are closed.