3 STUDES NAKUHANAN NG SHABU

TAGUIG CITY – TATLONG estudyante sa high school at kolehiyo ang inaresto ng pulisya matapos makuhanan ang mga ito ng shabu sa loob mismo ng compound ng kanilang  paaralan sa magkahiwalay na insidente sa Pasay at Taguig City.

Ang suspek na 17-anyos na binatilyo at high school student sa Corazon National High School sa Brgy. 184, Maricaban, Pasay City ay inaresto matapos na makunan ng tatlong plastic sachet na naglalaman ng shabu.

Base sa report ng Pasay City Police, ala-1:00 ng hapon nang makuhanan ang suspek ng tatlong plastic sachet na hinihinalang naglalaman ng shabu ng lady guard na si Marife Regala mismo sa loob ng naturang paaralan habang kinakapkapan ito.

Kaagad na dinala sa principal office ang suspek na agad na ini-report ang insidente  sa pulisya dahilan para dalhin ang mga ito sa presinto.

Sa Taguig City, dakong alas-2:30 ng hapon habang nagpapatrolya ang mga kagawad ng Taguig City Police sa  Taguig City University sa Brgy. Central Bicutan ng naturang siyudad ay namataan ang dalawang estudyante na kahina-hinala ang kilos.

Ang dalawang estudyante na naaresto ay nakuhanan ng limang sachet ng umano’y marijuana na nasa  8gramo  at isang   tooter matapos na ang mga ito ay masita at kapkapan ng mga pulis. MARIVIC FERNANDEZ